Shërbimi Korrektues i Kosovës ka ndërprerë të gjitha vizitat e familjarëve dhe të tjerëve për të burgosurit.
Për shkak të rritjes së rasteve të reja me koronavirus në vend, Shërbimi Korrektues i Kosovës (SHKK), ka njoftuar se ka ndërprerë të gjitha vizitat e familjarëve dhe të tjerëve për të burgosurit.
Përmes një njoftimit, SHKK-ja ka bërë të ditur se që nga 21 tetori do të ndërpriten vizitat deri në një datë tjetër, shkruan lajmi.net.
“Si alternativë në të gjitha institucionet korrektuese do mundësohen telefonatat me të shpeshta dhe sistemi i komunikimit virtual përmes SKYPE sipas procedurave institucionale. Po ashtu, për shkak të ndalimi te përkohshëm të vizitave, pastrimi i rrobave për të burgosur do të organizohet në Institucione”, thuhet ndër të tjerash në njoftim.
Njoftimi i plotë i SHKK-së, pa ndërhyrje:
Shërbimi Korrektues i Kosovës, njofton opinionin publik se duke pas për bazë numrin në rritje të rasteve me COVID 19 në shtetin tonë, me qëllim të parandalimit të përhapjes së pandemisë dhe mbrojtjes së shëndetit të burgosurve dhe stafit në institucionet korrektuese, Shërbimi Korrektues i Kosovës është detyruar që të ndërmarrë veprime të nevojshme, me ç` rast ka nxjerrë Urdhër Operativ për ndalimin e përkohshëm të vizitave familjare, vizitave të organizatave joqeveritare dhe vikendeve për të burgosur.
Kjo ndalesë fillon së zbatuari nga data 21.10.2020, e deri në një vendim tjetër.
Si alternativë në të gjitha institucionet korrektuese do mundësohen telefonatat me të shpeshta dhe sistemi i komunikimit virtual përmes SKYPE sipas procedurave institucionale. Po ashtu, për shkak të ndalimi te përkohshëm të vizitave, pastrimi i rrobave për të burgosur do të organizohet në Institucione.
Nga ky vendim përjashtohen Institucioni i Avokatit të Popullit dhe mbrojtësit rasteve të gjykimit, të cilat janë në zhvillim.
Shërbimi Korrektues i Kosovës do të vazhdojë bashkërendimin institucional me institucionet relevante të Republikës së Kosovës dhe do të mbajë të informuar opinionin e gjerë rreth hapave në vazhdim.
