Ministrja e Drejtësisë, Albulena Haxhiu ka reaguar pas sondazhit të publikuar nga Instituti Demokratik i Kosovës ku shumica e qytetarëve e përkrahin Vetingun në sistemin e drejtësisë.
Reformat në Drejtësi dhe mbështetja e qytetarëve
Në sondazhin e publikuar sot nga Instituti Demokratik i Kosovës, edhe njëherë konfirmohet mbështetja qytetare për reformat në drejtësi dhe rruga e drejtë e Ministrisë së Drejtësisë në proceset reformuese.
Mbi 70% e të anketuarve besojnë se reforma në drejtësi është e mundur.
Vetingu në sistemin e drejtësisë dhe Byroja Shtetërore për Verifikimin dhe Konfiskimin e Pasurisë së Pajustifikuar, gjejnë mbështetje të veçantë në këtë sondazh.
Përderisa 73,7% e qytetarëve janë deklaruar në mbështetje të Vetingut, 76.6% e të anketuarve kanë shprehur mbështetje për krijimin e Byrosë Shtetërore.
Ministria e Drejtësisë, mbetet e përkushtuar në proceset reformuese dhe vazhdon t’i trajtojë me prioritet nismat e tiila, të cilat do të sjellin qasje me të lehtë për qytetarët drejtësi, integritet, profesionalizëm dhe efikasitet, me synim kthimin e besimit të qytetarëve në drejtësi.
