Zëdhënësi i Departamentit të Shtetit, Ned Price, në një konferencë të djeshme për media, ka folur rreth dialogut Kosovë-Serbi.
I pyetur nga mediat rreth takimit të sotëm që pritet të ndodhë në Bruksel mes kryeministrit Albin Kurti dhe presidentit të Serbisë, Aleksandar Vuçiq, Price ka thënë se SHBA-ja është e kënaqur që liderët po takohen.
“Përgjithësisht, ne jemi të kënaqur që liderët e Serbisë dhe Kosovës do të takohen nesër në Bruksel në kuadër të dialogut të lehtësuar nga BE-ja. Ne e mbështesim plotësisht këtë dialog. Është e rëndësishme që ne besojmë se të dyja palët e përdorin këtë mundësi për të çuar përpara diskutimet e tyre mbi normalizimin. Është prioritet yni. Ne dëshirojmë të shohim progres të arritur dhe zbatimin e marrëveshjeve të kaluara të dialogut”, ka thënë mes të tjerash zëdhënësi i DASH-it, raporton Zeri.info.
Tutje, ai tha se dialogu dhe kompromisi janë komponentë kritikë të qeverisjes; ato nuk janë shenja dobësie.
“Të dyja janë thelbësore për të arritur një marrëveshje në pronësi lokale për normalizimin e marrëdhënieve, e cila mbetet thelbësore për aspiratat e të dy vendeve për në BE. Dhe ne shpresojmë që udhëheqësit në Serbi dhe Kosovë të kuptojnë rëndësinë e ecjes përpara, jo prapa, përmes dialogut të lehtësuar nga BE-ja”, deklaroi Price.
Ai tregoi se edhe i dërguari special i SHBA-së për Ballkanin Perëndimor, Gabriel Escobar, do të jetë i pranishëm në Bruksel për të mbështetur procesin e dialogut.
“Një zyrtar i lartë këtu nga Departamenti do të udhëtojë në Bruksel për të mbështetur takimet e liderëve në këtë dialog të lehtësuar nga BE-ja. Ne nuk jemi pjesëmarrës të drejtpërdrejtë në këto bisedime, por suksesi i këtyre bisedimeve, për pyetjen tuaj të dytë – dhe unë jam gjithmonë i neveritshëm të jap renditje ose nota, numerike ose të tjera – por është një prioritet absolut yni”, theksoi zëdhënësi Ned Price.
Sot në Bruksel pritet të takohen Kurti me Vuçiqin, bashkë me ndërmjetësin e këtij dialogu, diplomatin sllovak, Miroslav Lajçak.
