Komisioni Evropian ka publikuar Raportin për Kosovën për vitin 2022.
Në këtë raport është folur edhe për procesin e dialogut mes Kosovës dhe Serbisë, duke u kërkuar të tregohet më shumë konstruktivitet.
“Dialogu i ndërmjetësuar nga BE-ja për normalizimin e marrëdhënieve me Serbinë vazhdoi me takime të rregullta mujore në nivel të kryenegociatorëve dhe një takim të nivelit të lartë më 18 gusht 2022. Palët miratuan një Udhërrëfyes për Zbatimin e Marrëveshjeve të Energjisë në qershor 2022 dhe ranë dakord për udhëtimin vetëm me karta identiteti ndërmjet Kosovës dhe Serbisë në gusht 2022. Kosova duhet të angazhohet në mënyrë më konstruktive dhe të bëjë përpjekje të mëtejshme thelbësore për zbatimin e të gjitha marrëveshjeve të kaluara dhe të kontribuojë në arritjen e një marrëveshje gjithëpërfshirëse të normalizimit ligjërisht të detyrueshme me Serbinë”, thuhet në raport.
Tutje, në raport thuhet se një marrëveshje mes dy palëve është urgjente dhe vendimtare për t’i mundësuar Kosovës e Serbisë të avancojnë në rrugët e tyre evropiane.
Gjithashtu në raport theksohet edhe çështja e respektimit të marrëveshjeve të arritura deri më tani mes Kosovës e Serbisë, duke përmendur këtu edhe mos implementimin e Marrëveshjes për Asosacionin e komunave me shumicë serbe, të nënshkruar në vitin 2015.
“Autoritetet e Kosovës kanë dështuar të ndërmarrin veprime për themelimin e Asosacionit/Bashkësisë së komunave me shumicë serbe në Kosovë dhe Kosovës i kërkohet të angazhohet në mënyrë konstruktive për themelimin e Asosacionit pa vonesa dhe pa pengesa shtesë”, thuhet në raport.
Kujtojmë se çështja e Asosacionit ka qenë temë diskutimi edhe më herët pasi që institucioneve të Kosovës i është kërkuar tash e disa vite për të implementuar Marrëveshjen për Asosacionin.
