Presidenti ukrainas, Volodymyr Zelensky, ka miratuar strategjinë e sigurisë shtetërore të Ukrainës, njoftoi presidenca e vendit, transmeton Anadolu Agency (AA).
Sipas deklaratës, strategjia synon të sigurojë që shteti të ndërhyjë kundër kërcënimeve të brendshme dhe të jashtme për të përmirësuar sigurinë e shtetit në përputhje me standardet e vendosura nga Bashkimi Evropian (BE) dhe NATO.
Deklarata gjithashtu thekson se Rusia vazhdon luftën e saj hibride kundër Ukrainës në fushat politike, ekonomike dhe kibernetike. Sipas deklaratës, në Krimenë e “pushtuar ilegalisht” po ndodhnin shkeljet e të drejtave të njeriut, si dhe në rajonet nën kontrollin e separatistëve pro-rusë në Donbas.
Rusia, sipas zyrtarëve ukrainas, së fundmi grumbulloi më shumë se 100.000 trupa pranë kufijve të Ukrainës, duke shkaktuar frikën se Kremlini mund të planifikojë një ofensivë ushtarake kundër fqinjit të tij.
Rusia ka mohuar se po përgatitet për një pushtim dhe ka akuzuar vendet perëndimore për minimin e sigurisë së saj përmes zgjerimit të NATO-s drejt kufijve të saj.
Rusia gjithashtu përpiloi një listë të kërkesave të sigurisë drejtuar Perëndimit, duke përfshirë tërheqjen e dislokimit të trupave nga disa shtete ish-sovjetike dhe garanci që disa nga ato shtete nuk do të anëtarësohen në NATO.
Në një përgjigje me shkrim ndaj këtyre kërkesave, Washingtoni tha se është i përkushtuar të mbështesë “politikën e dyerve të hapura” të NATO-s.
Sekretari i Përgjithshëm i NATO-s, Jens Stoltenberg, tha se aleanca nuk do të bëjë kompromis mbi parimet thelbësore. Ai i përshkroi këto parime si të drejtën e çdo kombi për të zgjedhur rrugën e vet dhe aftësinë e NATO-s që të sigurojë dhe mbrojë aleatët e saj.
