Pas një promovimi disa mujor, kënga e re e artistes Adele tashmë është publikuar.
“Easy On Me”, një baladë me melodi emocionale të luajtur në piano, u publikua në mesnatën e Mbretërisë së Bashkuar, duke iu ofruar fansave pamjen e parë të albumit të saj të ri, të titulluar “30”.
Ky do të jetë vazhdimi i saj për albumet masivisht të suksesshme si: “19”, “21” dhe “25”, shkruan BBC.
(Videoja nuk është e disponueshme për territorin e Kosovës)
“Easy On Me” është një këngë, në të cilën Adele shpjegon vendimin e saj për t’u larguar nga martesa e saj në vitin 2019, ndërsa i kërkon djalit dhe ish-burrit të saj për mirëkuptim.
“Unë ndryshova atë që isha për t’ju vënë ju të dyve në radhë të parë”, këndon ajo, “por tani unë heq dorë”.
Zëri i Adeles është plot keqardhje, por edhe i vendosur.
Në klipin e këngës, regjisori Xavier Dolan zgjedh këtë moment për të kaluar nga bardh e zi në ngjyrë të plotë – duke e bërë të qartë se ky është tingulli i një gruaje që ka shkatërruar të gjithë botën e saj, duke kuptuar se ajo nuk ka pse të ndihet fajtore për ta vënë veten e para.
Adele (Foto: Simmon Ette)
Kënga ishte me sa duket kënga e parë e shkruar për albumin e ardhshëm të Adele, dhe daton në vitin e ndarjes së saj. Menjëhershmëria e atyre emocioneve është e dukshme në zërin e saj, njëkohësisht i fortë dhe i prekshëm.
Por ka edhe një bujari në këngë. Adele po i drejtohet njerëzve që i ka lënduar, por “Easy On Me” është gjithashtu një batanije e madhe e mbështjellë rreth vetmisë dhe dhimbjes së kujtdo që ka përjetuar një ndarje tronditëse.
Fansat në të gjithë botën qëndruan zgjuar për të dëgjuar “Easy On Me” sapo u shfaq premierë – me 299,000 njerëz që shikuan debutimin e saj drejtpërdrejt në YouTube.
Kjo vjen vetëm pak javë patra se albumi i saj i ri të publikohet, ndërkohë që titulli i albumit “30” është promovuar në ndërtesa të famshme në qytetet: Brazil, Meksikë, Dubai, Itali, Gjermani, Irlandë, SHBA dhe Britani të Madhe.
Ashtu si tri albumet e saj të mëparshme, titulli është një referencë për një moshë të caktuar në jetën e Adeles.
Tridhjetë është mosha në të cilën ajo u martua me partnerin e saj afatgjatë, Simon Konecki, dhe më pas e la atë.
Foto: Instagram
Ylli ka thënë se albumi është incizuar për të ndihmuar djalin e saj nëntë vjeçar të kuptojë divorcin e tyre vitin e ardhshëm.
“Doja t’i shpjegoja atij përmes këtij rekordi, kur ai të jetë në të 20-at ose 30-at e tij, kush jam unë dhe pse kam zgjedhur vullnetarisht të çmontoj gjithë jetën e tij në kërkim të lumturisë sime”, tha ajo për revistën ‘Vogue’.
“Kjo e bëri atë vërtet të pakënaqur ndonjëherë. Dhe kjo është një plagë e vërtetë për mua që nuk e di nëse do të jem ndonjëherë në gjendje ta shëroj”, shtoi ajo.
Duke folur për ‘Zoe Ball’ të BBC Radio 2, këngëtarja tha se albumi “ishte një punë e vështirë për t’u bërë”.
“Unë po këndoja gjëra që as nuk i kuptoja se po ndieja ose mendoja”’ tha ajo, duke shtuar se ishte e rëndësishme për të që t’i ndante ato emocione me botën.
“Ndihem sikur nuk mund të hap një derë për shëndetin tim mendor dhe të marr çelësin me vete. Unë duhet ta lë atë në derë për të gjithë të tjerët – dhe jam në një vend të fortë tani ku ndihem sikur i them vetes: ‘Unë mund ta heq atë dobësi’”.
Në një intervistë të veçantë me Greg James të BBC Radio 1, ajo pranoi se miqtë e saj nuk kishin qenë shumë të impresionuar nga “Easy On Me” kur ajo iu tregoi demon.
Adele (Foto: Reuters)
“Unë i dërgova një fragment prej këngës, ndërsa po e shkruaja, tre prej miqve të mi më të ngushtë”, tha ajo.
“Njërit nuk i pëlqeu, njëri ishte si: ‘vazhdo të provosh’, dhe tjetri ishte si: ‘Unë jam i zënë me punë’. Pra, kjo ishte përgjigja perfekte”, tregoi artistja britanike.
Pasi mbaroi, megjithatë, ajo tha se “ata e donin atë”.
“Dhe unë nuk bëj asnjë këngë në kohën time të pushimit. Nuk është një muskul që e ushtroj – duke shkruar ose kënduar”, shtoi ajo.
“Kështu që shumicën e kohës, edhe vetëm për miqtë e mi më të mirë dhe menaxherin tim, reagimi i tyre i parë, pavarësisht se cila këngë është, është si: ‘është mirë të të dëgjoj të këndosh’”.
