Përfaqësuesi Special i Bashkimit Evropian për dialogun Kosovë-Serbi, Miroslav Lajçak, do të vizitojë sot Kosovën e më pas do të vazhdojë vizitën e tij për në Serbi.
Por para kësaj, Lajçak ka deklaruar se ka hapësirë të mjaftueshme që Kosova dhe Serbia të bien dakord për marrëdhëniet e ndërsjella.
Ai tha se gjatë vizitës së tij në Kosovë dhe në Serbi do të donte të dëgjonte përgjigjen e pyetjes së kur do të vazhdojë dialogu në Bruksel.
“Nuk është sekret që unë pres që BE të vazhdojë dialogun dhe se për Prishtinën dhe Beogradin, dialogu është i pashmangshëm në rrugën drejt BE-së. Bashkimi Evropian është këtu, ne jemi gati se kur do të ndodhë. Unë pres të dëgjojë përgjigjen gjatë kësaj vizite”, tha Lajçak, shkruan lajmi.net.
Lajçak deklaroi se nuk po vije me ndonjë ultimatum për askënd dhe se Bashkimi Evropian është për të ndihmuar.
“Qëllimi i dialogut është të mbështesë edhe Prishtinën edhe Beogradin dhe të sjellë të ardhmen evropiane më afër gjithë rajonit”, tha ai.
I pyetur lidhur me angazhimin konstruktiv të qeverisë së re të Kosovës, e cila pritet të përfaqësohet nga fituesi i zgjedhjeve, Albin Kurti, Lajçak vlerësoi se Kurti e di mirë se çfarë pritet prej tij dhe se deklaratat e tij të para për vazhdimin e dialogut nuk duhet të dramazitohen.
“Ai u zgjodh për të zgjidhur disa çështje të brendshme të Kosovës, të tilla si korrupsioni, drejtësia dhe çështjet sociale dhe ai e di shumë mirë se Bashkësia Ndërkombëtare, BE-ja dhe SHBA-të presin që dialogu të vazhdojë dhe ai është i gatshëm për këtë”, tha Lajçak për mediat serbe.
Lajçak deklaroi se qëllimi i dialogut është normalizimi i marrëdhënieve për të rënë dakord se çfarë në fakt është normale.
I pyetur se ku e sheh hapësirën e kompromisit në një dialog ku Prishtina këmbëngul në njohje të ndërsjellë dhe Beogradi thotë se nuk do të ketë njohje, Lajçak deklaroi se sheh hapësirë për marrëveshje dhe normalizim.
“Ka vend për normalizimin e marrëdhënieve dhe ka hapësirë për arritjen e një marrëveshje që do të zgjidhë të gjitha çështjet e hapura dhe do të përshpejtojë rrugët evropiane të Kosovës dhe Serbisë. Jam absolutisht i bindur për këtë”, shtoi ai.
Lajçak theksoi se qëllimi është të arrihet një marrëveshje gjithëpërfshirëse që do të zgjidhë të gjitha çështjet e hapura në mes dy palëve, duke përfshirë marrëveshjet për çështje të reja, por gjithashtu marrëveshjet e arritura tashmë që nuk janë zbatuar akoma.
“Garantuesit e asaj marrëveshje gjithëpërfshirëse do të jenë të dy palët dhe Bashkimi Evropian. Do të ketë një mekanizëm që rregullisht do të kontrollojë përmbushjen e të gjitha marrëveshjeve nga marrëveshja gjithëpërfshirëse. Marrëveshja nuk është fundi i rrugës së integrimit evropian, por fundi i një faze të rëndësishme pas së cilës është përparimi në rrugën evropiane, që varet nga përmbushja”, tha Lajçak.
Ai tha se vazhdon të qëndrojë prapa vlerësimit se është e mundur të arrihet marrëveshja përfundimtare gjithëpërfshirëse në mes Prishtinës dhe Beogradit “brenda disa muajsh”, por thekson se BE-ja nuk do të jetë ajo që do të vendos kur do të jetë.
