Në njoftimin e FFK-së të cilin ia kanë bërë FC Prishtinës shpjegohet për gjendjen e renduar të terrenit, për shkak të dendësitetit të ndeshjeve jo vetëm të kombëtareve, por edhe të ekipeve kosovare të cilat kanë dalë në Evropë, sic është rasti me FC Ballkanin. E një vendim të tillë, nga FC Prishtina e kanë konsideruar si tendencioz dhe janë munduar që me akuza, të nxisin pakënaqësi tek tifozëria e kryeqytetit, të cilët në ndeshjen e nesërme i kanë ftuar të jenë prezent në “Fadil Vokrri”, duke i përdorur si “mish për top” nëse do të ishte termi i duhur në këtë rast.
Në fakt ndeshja është shtyer për afat të pacaktuar nga komisioni i garave. Ky vendim është marrë për shkak të sic thuhet, gjendjes së fushës në stadiumin ‘Fadil Vokrri’ është në gjendje kritike dhe inspektori i UEFA-s nuk ka lejuar as mbajtjen e stërvitjeve zyrtare për ekipet kombëtare U17, në turneun kualifikues të Evropianit, që do të zhvillohet në stadiumin “Fadil Vokrri” dhe në stadiumin “Zahir Pajaziti”.
Për ta trajtuar këtë qështje, ne kemi kontaktuar ish-ministrin e Kulturës, Rinisë dhe Sporteve të Republikës së Kosovës, z. Kujtim Gashi, në kohën e të cilit me procedurë absolutisht ligjore, por të përshpejtuar, është vendosur që të investohet në stadium, kjo nga vullneti politik ndër të tjera edhe I z. Gashi, që kombëtarja e Kosovës ndeshjet e saja ti zhvillojë para tifozërisë së vetë, e jo në stadiumet e vendeve fqinje, gjegjësisht në Shqipëri.
“Stadiumi është investuar për të plotsuar kushtet si i kategorisë së katërt, në mënyrë që të luhen ndeshjet ndërkombëtare, kjo pasi që ka qenë rreziku që Kosova t’i zhvillojë ndeshjet në rajon, gjegjësisht në Shqipëri, cka unë nuk kam dashur dhe në kohë rekord kemi arritur që të kryejm investimet e nevojshme, jo të vogla, ku qëllim kryesorë pra ka qenë plotësimi i kushteve për ndeshjet e kombëtareve të Kosovës, si dhe për klubet që arrijnë të plasohen për ndeshje evropiane. Të gjithë e dini se stadiumi “Fadil Vokrri” është pronë e Komunës së Prishtinës dhe ata vendosin bashkë me FFK-në duke u koordinuar pse jo edhe me MKRS-në, se kujt mund t’i mundësohet të zhvillojë ndeshje aty. Thash, në stadium është investuar që të plotësojë kushtet për Kosovën dhe klubet që dalin në Evropë të cilat e kanë ekskluzivitetin, por pastaj duke pas parasysh që “Fadil Vokrri” është pronë e Komunës së Prishtinës, ata vlerësojnë së bashku nëse ka kushte që fusha t’i përballojë edhe ndeshjet e Super Ligës apo jo. Në parim, nëse më pyesin mua, unë mendoj se Prishtina duhet të luaj në stadiumin e kryeqytetit, pasi që njejtë ndodhë edhe në Prizren, në Gjakovë apo Mitrovicë etj, por, e thash edhe më lartë se aty duhet të shihen mundësitë, në mënyrë që mos të rrezikohet fusha”, ka përfunduar z. Gashi.
Në anën tjetër, ne kemi biseduar edhe me udhëheqësin e projektit të investimit në stadium, z. Ibër Alaj i cili ngjashëm sikurse z. Gashi, ka thënë se investimet kanë ndodhur në mënyrë që kombëtarja të mos luaj në Shkodër, sic ka qenë e mundur të ngjajë nëse investimet nuk do të kishin ndodhur.
“Kanë qenë procedura të gjitha në pajtim me Ligjin e Prokurimit Publik. Ka qenë interes publik që Republika e Kosovës ta ketë stadiumin e sajë që i plotëson kushtet për ndeshje ndërkombëtare si i kategorisë së IV-të, rregullore të cilën e bënë UEFA dhe ne këtë e kemi bërë në mënyrë që kombëtarja jonë të mos shkojë e ti zhvillojë ndeshjet në Shkodër, sic ka qenë e mundur të ndodhë. Mendoj se edhe FC Prishtina mund të luaj ndeshjet e saja në “Fadil Vokrri”, por vetëm në rastet kur fusha është në gjendje t’i përballojë ndeshjet ekstra, për shkak të barit i cili mund të mos i përballojë”, është shprehur z. Alaj.
E duke pas parasyshë gjendjen e terrenit në të cilën sot gjendet stadiumi “Fadil Vokrri” të cilën do tua prezantojmë në disa fotografi, ne kemi tentuar ta kontaktojmë edhe të parin e Komunës së Prishtinës apo drejtorin për sport, por kanë qenë të pa qasshëm, ndoshta për shkak të vikendit.
