Kampionet Distria Krasniqi dhe Nora Gjakova shpërfaqën edhe një herë elegancën e tyre gjatë pranimit të çmimeve “Laureatët 2021”

Komiteti Olimpik i Kosovës (KOK) në një ceremoni zyrtare të enjten bëri përzgjedhjen e “Laureatëve” të vitit 2021, respektivisht sportistët më të mirë të vitit që lamë pas.

Në kategorinë e femrave, më e mira u zgjodh kampionia olimpike Distria Krasniqi.

Ndërkohë, çmimi special në kategorinë e femrave iu dhurua kampiones tjetër olimpike me prejardhje nga Peja, Nora Gjakovës.

Të dyja sportistet që i bënë krenarë shqiptarët vitin e kaluar gjatë Lojërave Olimpike në Tokio, u dukën elegante në mbrëmjen gala të ndarjes së çmimeve.

Distria kishte veshur një kostum të bardhë elegant, me mëngë të fryra dhe një sako të hapur te pjesa e belit.

Ajo i kishte lënë flokët e saj bionde thuajse në valë të lirshme, duke kapur vetëm pjesën e balukeve, me ç’rast mori një pamje tejet tërheqëse.

Jo me më pak elegancë dukej edhe xhudistja Nora Gjakova, e cila për këtë mbrëmje kishte veshur një fustan të zi të shkurtër.

Gjakova kishte realizuar një makijazh nën nuancat e ngjyrës rozë, me çka ra edhe më tepër në sy me këtë detaj.

Të dy xhudistet kanë pozuar me trofetë e tyre përkatëse në duar pas përfundimisht të ceremonisë.