Policia e Kosovës ka reaguar në favor të sqarimit të situatës pas shkrimeve të publikuara dje në media se dy zyrtarë rusë të shpallur non-grata nga institucionet e Kosovës janë parë në Kosovë.
Në reagimin e tyre, policia e Kosovës thotë se Alexey Krivosheev dhe Denis Vengerskii dhe me 23 tetor, të dy e kanë lëshuar Kosovën përmes pikës kufitare në Merdare, shkruan lajmi.net.
“Vlen të potencohet se të njëjtit, nga data 23.10.2021, nuk kanë hyrë në Republikën e Kosovës, ndërsa personi i cili është publikuar dhe shfaqur në media përmes fotografive dhe videos, është person tjetër (V.L.) i njohur për institucionet e sigurisë në Kosovë, si punonjës në zyrën ruse në Kosovë.”,
Ky është sqarimi i plotë i policisë:
Sqarim i Policisë së Kosovës ndaj shkrimeve të pavërteta të publikuara në disa media lidhur me dy shtetasit rus të shpallur non-grata
Prishtinë, 02 nëntor 2021
Policia e Kosovës, me qëllim informimin e drejtë të opinionit publik, përmes këtij njoftimi zyrtar demanton shkrimet dhe publikimet e bëra në disa media televizive dhe të shkruara në Kosovë dhe Shqipëri, të cilat shfaqin tituj dhe video ekskluzive: “Rusi i shpallur non-grata nga Kosova shfaqet mes Prishtinës”.
Këto informacione janë të pavërteta dhe Policia sqaron se:
Dy personat Alexey Krivosheev dhe Denis Vengerskii shtetas rus, janë shpallur non-grata nga institucionet shtetërore të Kosovës me datë 22.10.2021, dhe bazuar në informacionet zyrtare të Policisë së Kosovës të evidentuara në sistemin kufitar, të njëjtit me datë 23.10.2021 (në ora 14:46 dhe 14:50), përmes pikës kufitare në Merdare kanë lëshuar territorin e Republikës së Kosovës.
Vlen të potencohet se të njëjtit, nga data 23.10.2021, nuk kanë hyrë në Republikën e Kosovës, ndërsa personi i cili është publikuar dhe shfaqur në media përmes fotografive dhe videos, është person tjetër (V.L.) i njohur për institucionet e sigurisë në Kosovë, si punonjës në zyrën ruse në Kosovë.
Policia e Kosovës do të vazhdojë angazhimin dhe përkushtimin e saj, në zbatimin e ligjeve dhe kushtetutës së Republikës së Kosovës, në interes të ruajtjes së rendit dhe sigurisë publike në vend.
