Kreu i Aleancës për Ardhmërinë e Kosovës, Ramush Haradinaj, ka kritikuar Lëvizjen Vetëvendosje, për faktin se e ka kandiduar miniostrin aktual të Shëndetësisë, Arben Vitinë, për kryetar të Prishtinës
Haradinaj në një konferencë për media ku prezantoi të gjithë kandidatët e AAK-së për kryetarë komunash, tha se kandidimi i Arben Vitisë është një porosi e keqe që po dërgohet nga Lëvizja Vetëvendosje, në kohën kur janë rritur numrat e të prekurve me COVID-19.
“Porosia është e keqe që po e dërgon Vetëvendosje në këtë rast edhe nëse e kanë të vetmin kandidat të mirë, është e keqe, sepse po e heqin ministrin e Shëndetësisë, është porosi e gabuar me heq ministrin e Shëndetësisë. Nëse e kishin heq se nuk është i suksesshëm në menaxhim të pandemisë, ka kuptim, por ta heqin kur kemi përkeqësim të gjendjes për interes të një gare është pak e dhimbshme që po e shohim. Nuk e di a duhet ta shkarkojë por është e dhimbshme se ai nuk e ka mendjen më te pandemia, por e ka te gara dhe nuk është në rregull”, ka deklaruar Haradinaj.
Ndryshe, në garë për të parin e Prishtinës janë Daut Haradinaj nga AAK, Arben Vitia nga VV, Përparim Rama nga LDK dhe Uran Ismaili nga PDK.
