IndeksOnline ka raportuar në mëngjesin e së enjtës se janë krijuar tollovi të shumta të personave para ambulancave specialistike në Qendrën Klinike Universitare të Kosovës.
Për këtë është sqaruar Shërbimi Spitalor Klinik Universitar të Kosovës, duke thënë se pacientët nuk respektuan terminet për kontrolla mjekësore.
Sipas tyre, SHSKUK ka angazhuar staf shtesë shëndetësor dhe administrativ për të mbuluar të gjitha kërkesat.
Njoftimi:
Sqarim
Shërbimi Spitalor Klinik Universitar i Kosovës ju sqaron se situata e krijuar sot para ambulancave specialistike në Qendrën Klinike Universitare të Kosovës, kanë ardhur si pasojë e mos respektimit të termineve për kontrolla mjekësore.
SHSKUK ka angazhuar staf shtesë shëndetësor dhe administrativ për të mbuluar të gjitha kërkesat, prandaj asnjë qytetar nuk do të privohet nga e drejta për të marrë shërbimet e nevojshme mjekësore-ambulantore.
Pavarësisht zvogëlimit të numrit të rasteve me COVID-19, me qëllim të shmangies së situatave të tilla dhe mundësisë së përhapjes së infeksionit, SHSKUK fton të gjithë qytetarët që të respektojnë terminet për kontrolla mjekësore dhe masat anti covid.
Ju lutemi, vendoseni maskën dhe mbajeni distancën!
