Kurti: Pritja e trupave amerikane dhe stërvitja e përbashkët po ngritin aftësinë dhe gatishmërinë e ushtarëve të FSK-së

May 25, 2021

Kryeministri i Kosovës, Albin Kurti është deklaruar lidhur me ‘Defender Europe 21’, apo stërvitja më e madhe ushtarake pas Luftës së Dytë Botërore.

Kurti tha se mes 28 mijë ushtarëve nga 27 vende të përfshirë në këtë stërvitje, janë edhe njësitë e veçanta të Forcës së Sigurisë së Kosovës, me mbi 300 ushtarë.

Sipas Kurtit kjo e ka bërë Kosovën për herë të parë vend pritës të një ushtrimi kaq të madh, që drejtohet nga ushtria e SHBA-së për Evropë dhe Afrikë.

Kryeministri Kurti theksoi se ushtarët e FSK-së po tregojnë përkushtimin dhe profesionalizimin me aktivitetet stërvitëse të ‘Defender Europe 21’ .

Postimi i plotë:

Nga Baltiku në Detin e Zi dhe deri në Mesdhe, nën drejtimin e ushtrisë amerikane, po zhvillohet “Defender Europe 21”, stërvitja më e madhe ushtarake pas Luftës së Dytë Botërore. Mes 28 mijë ushtarëve nga 27 vende të përfshirë në këtë stërvitje, janë edhe njësite të veçanta të Forcës së Sigurisë së Kosovës, me mbi 300 ushtarë. Kjo e ka bërë Kosovën për herë të parë vend pritës të një ushtrimi kaq të madh, që drejtohet nga Ushtria e ShBA-së për Evropë dhe Afrikë. Ushtarët e FSK-së po tregojnë përkushtim dhe profesionalizëm në aktivitetet stërvitëse të “Defender Europe 21”, në Kosovë, Shqipëri dhe Kroaci. Pritja e trupave amerikane në vendin tonë dhe stërvitjet e përbashkëta me trupat e vendeve aleate, po ngritin aftësinë dhe gatishmërinë e ushtarëve të FSK-së si dhe ndërveprueshmërinë e tyre me partnerët tanë strategjikë.