Drita e ka përfunduar aventurën e saj evropiane në Ligën e Konferencës pas një përballje të ashpër me Legian e Varshavës në fazën e ‘play-off’-it. Ndeshja kthyese, e zhvilluar në stadiumin “Fadil Vokrri” në Prishtinë, përfundoi me rezultat 0:1 në favor të mysafirëve polakë. Me këtë fitore, Legia siguroi kualifikimin tutje me rezultatin e përgjithshëm 3:0.
Drita hyri në ndeshje me një energji të madhe dhe një dëshirë të flaktë për të përmbysur disavantazhin nga ndeshja e parë. Pavarësisht përpjekjeve të vazhdueshme dhe momenteve premtuese, skuadra gjilanase nuk arriti të realizojë asnjë gol që do të mund të rihapte garën për kualifikim. Në minutat e hershme të ndeshjes, qendërmbrojtësi Juan Mesa pati rastin e parë serioz, por nuk arriti të dërgojë topin te bashkëlojtarët e tij në pozicion të favorshëm për shënim.
Sulmuesi Veton Tusha ishte afër golit në minutën e 27-të, kur një harkim i saktë i Besnik Krasniqit e gjeti atë në zonë, por kontrolli jo i duhur i topit ia pamundësoi realizimin. Gjatë pjesës së dytë, Drita intensifikoi përpjekjet për të gjetur rrjetën, me mesfushorin Ilir Mustafa që në minutën e 75-të pati rastin më të mirë për shënim, por gjuajtja e tij me të majtën përfundoi shumë pranë shtyllës pingule.
Momente të vështira për skuadrën gjilanase u krijuan në minutën e 77-të, kur kapiteni Rron Broja u ndëshkua me kartonin e dytë të verdhë, duke e lënë Dritën me një lojtar më pak në fushë. Edhe pse në disavantazh numerik, Drita vazhdoi të sulmonte dhe e kërcënoi seriozisht portën kundërshtare me një gjuajtje nga distanca të Almirit Ajzeraj, por pa sukses.
Legia, e cila erdhi në Prishtinë me një epërsi komode nga ndeshja e parë, menaxhoi mirë lojën dhe mbrojtjen, duke e mbajtur Dritën larg nga shënimi i golit. Në minutat shtesë të ndeshjes, çeku Tomas Pekhart shënoi golin e vetëm të takimit, duke vulosur fitoren e Legias dhe eliminimin e Dritës nga gara evropiane.
