Raportohet se vrasësi i Liridonës deklaroi në polici se është paguar nga Naim Murseli

Bashkëshortja e Naim Murselit, ish-këshilltarit të ish-presidentit të Kosovës, Behgjet Pacolli, Liridona Murseli, ka mbetur e vrarë të mërkurën si pasojë e të shtënave me armë zjarri në Prishtinë.

Por, sot policia ka arrestuar dy persona lidhur me rastin. Në media u raportua se një nga të arrestuarit është vetë Naim Murseli.

Flora Ahmeti, zëdhënëse në Policinë e Kosovës për rajonin e Prishtinës,  ka konfirmuar për Gazetën Insajderi se aksioni i policisë është duke u zhvilluar në Gjakovë dhe se janë arrestuar dy persona.

“Pas përfundimit të  ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar  lidhur me rastin e sipër shënuar.Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë“, tha ajo.

Siç raporton Koha.net, autori që dyshohet se ka kryer vrasjen e ka pranuar në Polici veprën dhe ka thënë se është paguar nga Murseli. Murseli dhe autori i dyshuar janë bashkëfshatar mes vete.

Sipas Policisë, operacioni është duke vazhduar me bastisjen e dy lokacioneve në Gjakovë.

Rasti po hetohet si vrasje me armë zjarri.

Fillimisht, ishte thënë se vrasja ka ndodhur pas një rasti që kishte të bënte me plaçkitje.