Kombëtarja e Kosovës në futboll në rënie të lirë. Pas tri barazimeve dëshpëruese, “Dardanët” tani ka shënuar edhe humbjen zhgënjyese, duke pësuar nga një ekip si Bjellorusia me rezultatin 2:1.
Me këtë rezultat, lëre që shuhen gjasat për kualifikim historik në Evropian, që ishte prioritet i deklaruar nga Federata e Futbollit e Kosovës dhe kombëtarja, por tani Kosova ka rënë në pozitën e parafundit në grup me vetëm tri pikë.
Më keq se Kosova është vetëm Andorra, ekip me të cilin po ashtu kemi barazuar dhe e ka vetëm atë pikë të fituar nga katër përballjet e luajtura.
Pjesa e parë u mbyll pa gola të shënuar, me Kosovën që dominoi shumicën e kohës ndeshjen dhe pati më shumë raste shënimi.
E pjesa e dytë ishte e tmerrshme për “Dardanët”
Morozov në të 73-tën dhe Ebong dy minuta më pas realizuan për epërsinë e dyfishtë të bjellorusëve.
Vedat Muriqi ngushtoi epërsinë në minutën e 87-të nga pika e penalltisë.
Kësisoj, Kosova humbet pothuajse të gjitha gjasat për kualifikim në grupin I, teksa gjendet e pesta, prapa Zvicrës, Rumanisë, Izraelit e Bjellorusisë.
Ndeshjet e radhës, Kosova i zhvillon në muajin shtator, e që do të jenë sa për sy e faqe.
