Një shpërthim me lëndë plasëse është shënuar mbrëmjen e djeshme në qendër të Durrësit , ku është sulmuar shtëpia e Presidentit të FSHF-së, Armand Duka. Lidhur me këtë ngjarje ka reaguar edhe presidenti i FFK-së, Agim Ademi, i cili ndodhet në Turqi. I pari i futbollit kosovar e ka dënuar këtë sulm, duke e vlerësur si akt kriminal dhe të shëmtuar nga njerëz të ligë.
Reagimi i plotë i Ademit
I tronditur me lajmin që mbrëmë vonë është sulmuar me tritol shtëpia e presidentit të FSHF-së, Armand Duka në Durrës.
Akti i tillë kriminal e i shëmtuar përveç se ka shkaktuar frikë e tronditje në familjen Duka, pa dyshim është një ngjarje e rëndë edhe për futbollin shqiptar dhe Shqipërinë si shtet në përgjithësi, veçmas duke pasur parasysh faktin se z. Duka është edhe anëtar i KE të UEFA-s.
Fatmirësisht miku im Armand Duka dhe familja e tij janë mirë dhe kanë kaluar pa pasoja nga ky akt i njerëzve të ligë.
Familjes së tij i ofroj tërë mbështetjen time dhe të komunitetit të futbollit kosovar, me shpresë që kryerësit e këtij akti të vihen para drejtësisë dhe në të ardhmen të mos ballafaqohet me ngjarje të tilla.
