Policia e Kosovës ka zhvilluar një sërë aksionesh për kapjen e personave në kërkim, për shkak të dosjes kriminale të tyre. Si rrjedhojë e këtyre angazhimeve, sot njësitet policore të Stacionit Policor të Podujevës, të mbështetura edhe nga njësitë e Stacionit Policor në Vushtrri, kanë arrestuar një person të dyshuar.
I dyshuari me iniciale G.O., mashkull, 31 vjeç, shtetas i Republikës së Kosovës, ka qenë në kërkim me urdhëresa të gjykatës për vepra penale kundër pasurisë (vjedhje të rënda).
Hetuesit policorë në koordinim me institucionet përkatëse po kryejnë veprimet e nevojshme procedurale, ndërkohë që personi i arrestuar është dërguar në vuajtje të dënimit.
Nga Drejtoria Rajonale e Policisë në Prishtinë, gjatë vitit 2021, janë realizuar 9626 urdhëresa.
