154 kandidatë kanë kaluar testin kulaifikues në kuadër të procesit të rekrutimit të gjyqtarëve të gjykatave themelore të Republikës së Kosovës.
Nga gjithsej 568 aplikantë të cilët kishin plotësuar kushtet, 494 prej tyre i janë nënshtruar testit kualifikues të organizuar nga Këshilli Gjyqësor i Kosovës (KGjK) të dielën, ku 154 prej tyre kanë arritur ta kalojnë, raporton “Betimi për Drejtësi”.
Testi kualifikues ka përmbajtur 100 pyetje dhe ka zgjatur 2 orë, ndërsa i gjithë procesi i organizimit ka zgjatur mbi 17 orë.
Në këtë procedurë rekrutimi, komisioni i udhëhequr nga kryesuesi i KGjK-së, Albert Zogaj, në të njëjtën ditë kanë përpiluar pyetjet, kandidatët i janë nënshtruar testimit si dhe është bërë vlerësimi dhe publikimi i rezultateve.
Ndryshe, sipas Rregullores Nr.03/2021 për Rekrutimin, Provimin, Emërimin dhe Riemërimin e gjyqtarëve e miratuar në këtë vit nga Këshillit Gjyqësor i Kosovës, është përcaktuar se kandidatët që kalojnë testin e parë kualifikues do të mund t’i nënshtrohen pjesës së dytë të testimit, që përfshinë testin me shkrim, kurse pjesa e tretë e testimit përfshinë intervistën me gojë dhe një ese.
