Gjykata Supreme e Kosovës e ka rikthyer masën pezulluese mbi punën e Hidrocentralit “Brezovica”. Kështu kanë bërë të ditur organizatat Grupi për Studime Juridike dhe Politike dhe GAIA, ku sipas tyre gjykata e ka prishur aktvendimin e Apelit në të cilin thuhej se pa asnjë bazë që ndalja e punës së hidrocentralit ishte kundër interesit publik.
Në një konferencë për media, Arbër Fetahu nga GLPS, ka thënë se Supremja ka konstatuar se arsyetimi i aktvendimit të Gjykatës së Apelit është i mangët dhe jobindës mbi faktet vendimtare.
“Ky aktgjykim i Gjykatës Supreme është një fitore shumë e madhe për qytetarët e Shtërpcës sepse do të thotë që me pezullimin e lejes ujore për Hidrocentralin Brezovica, kompania ndërtuese nuk mund të aplikojë për leje mjedisore, lëshimi i të cilës është parakusht për të operuar hidrocentrali. GLPS dhe GAIA kanë dërguar padi vetëm kundër lejes ujore për Hidrocentralin Brezovica, sepse është e vetmja që kanë pranuar deri më tani nga Ministria e Mjedisit, edhe pse që gati një vit kërkojnë lejet ujore për hidrocentralet tjera në Shtërpcë, pra hidrocentralet Sharri, Shtërpca dhe Viça. Shkeljet ligjore në këtë rast kanë qenë të mëdha dhe të shumta”, ka thënë Fetahu.
Ai ka thënë se e gjithë procedura rreth këtij hidrocentrali ishte jotransparente.
“Fillimisht, duhet të theksojmë që lejet dhe aktet tjera të Ministrisë janë dhënë në shkelje flagrante të së drejtës kushtetuese të qytetarëve për të marrë pjesë në vendimet për mjedisin ku jetojnë. Qytetarët e Shtërpcës nuk janë njoftuar sipas ligjit se do të mbahet debati publik për kaskadën e Hidrocentraleve në Shtërpcë. Për këtë arsye, “debati publik”, nëse mund ta quajmë ashtu, është mbajtur vetëm me zyrtarë të Ministrisë dhe kompaninë ndërtuese. Kjo është shkelje serioze e Kushtetutës së Republikës së Kosovës, dhe bazë për anulimin e të gjitha lejeve dhe akteve tjera. Pra, e gjithë procedura, që nga fillimi, ka qenë jotransparente, gjë që po e thotë edhe vetë Raporti i Ministrisë tani”, ka thënë ai.
Ai ka thënë se hidrocentralet e kundërligjshme kanë degraduar rëndë mjedisin, florën e faunën, e kanë çrregulluar ekosistemin dhe kanë shëmtuar peisazhin.
E Mevlude Skuroshi nga organizata GAIA, ka thënë se vendimi i Supremes konfirmon përpjekjet e organizatave joqeveritare në këtë çështje.
“Unë këtë rast po du me e shfrytëzua për me ja kujtu ministrit Liburn Aliu që në vizitën e tij zyrtare që e ka bërë në pranverë të këtij viti u ka ofruar mbështetje banorëve lokal në Shtërpcë si në hapësirën ku është ndërtu hidrocentrali Brezovica por edhe poshtë në fshatin Viti, dhe pavarësisht se është parë degradimi, edhe vet e ka parë që këto hidrocentrale janë ndërtuar në mënyrë jo ligjore ai pat thënë që i duhet me bo një analizë pak me thellë gjë që është bërë prej grupit punues të themeluar vet prej ministrisë, dhe ky grip punues ka pasur mandate deri në fund të qershorit dhe raporti ka dalur në gusht të këtij viti dhe tash janë bërë tetë muaj prej vizitës dhe pesë muaj prej grupit punues dhe nuk ka asnjë hap konkret prej ministrisë”, ka thënë ajo.
Sipas Gjykatës Supreme, paditësit kanë paraqitur prova bindëse se atyre do t’u shkaktohej dëme, se shtyrja e ekzekutimit të lejeve për Hidrocentralin në Brezovicë nuk ishte kundër interesit publik, dhe se kompanisë ndërtuese nuk do t’i shkaktohejë ndonjë humbje të madhe.
GLPS dhe GAIA kanë dërguar padi në këtë rast përmes Qendrës për Raste Gjyqësore Strategjike.
