Kandidati i PDK-së për kryetar të Prishtinës, Uran Ismaili, ka bërë thirrje për vaksinim.
Përmes një postimi në Facebook, deputeti i PDK-së thotë se situata me pandeminë po del jashtë kontrollit.
Ismaili tha se Kosova është ndër vendet me vaksinimin më të ulët në Evropë dhe me numrat më të frikshëm të infektimit.
Andaj, bën thirrje tek qytetarët që të vaksinohen në mënyrë që ta mbrojnë veten dhe shoqërinë.
Postimi i plotë:
“Situata me pandeminë është duke dalë jashtë kontrollit. Tani jemi ndër vendet me vaksinimin më të ulët në Evropë dhe me numra të frikshëm të infektimit.
Aktualisht janë mbi 20.000 raste aktive me koronavirus dhe brenda javës së fundit i kemi pasur 57 raste të vdekjes, prej tyre 17 kanë vdekur vetëm në 24 orët e fundit.
Nuk duhet të presim situata ku shohim më të dashurit tanë të sëmurë, t’i shohim spitalet e mbipopulluara, stafin mjekësor të rraskapitur e të mbingarkuar, ndërsa bizneset duke u përballur me kufizime të reja.
Këtë e kemi përjetuar një herë. Nuk duhet dhe as nuk kemi nevojë ta përjetojmë prapë.
Duhet të veprojmë, menjëherë! Secili prej nesh.
Është e thjeshtë. Duhet të vaksinohemi!
Nëse tashmë je vaksinuar, unë dhe familja ime të falënderojmë ngase ti ke bërë diçka jo vetëm që e mbron veten por edhe të tjerët.
Por, nëse e di që ndonjë familjar, mik apo koleg ende nuk është vaksinuar, telefonoje sot dhe bisedo me të e kerko nga ajo apo ai që ta marrë vaksinën.
Kështu e mbrojmë veten, familjen por edhe krejt shoqërinë tonë.
Vaksinohu SOT!
Faleminderit!”.
