FFK me telegram ngushëllimi për ndarjen nga jeta të 17-vjeçarit Denis Bakalli, i cili ishte futbollist i KF Gjakovës

Para mesnatës të së premtes, Denis Bakalli së bashku dy shokë të tij ishin ngjitur në një objekt banesor në ndërtim e sipër, ndërsa ka rënë nga kati i gjashtë i objektit tek hapësira për ashensor.

Policia ka konfirmuar se djaloshi kishte hipur për të konsumuar cigare, ndërsa aty gjeti vdekjen, pasi në orën 00:30 të mëngjesit u konfirmuar se ai nuk mundi t’i mbijetojë plagëve.

Djaloshi i vdekur tragjikisht tashmë, Denis Bakalli, ishte futbollist i klubit KF Gjakova, klub i cili doli me një njoftim pasi morën lajmin e kobshëm.

Sipas klubit gjakovar, Bakalli ishte djalosh shembull dhe futbollist shumë i talentuar, ndërsa sot pritej t’i bashkohej ekipit në ekspeditën e tyre disa-ditore në Durrës.

Edhe Federata e Futbollit të Kosovës ka dalur me një telegram ngushëllimi për ndarjen nga jeta të futbollistit të ri, Denis Bakalli.

E nderuara Familje Bakalli,

Të nderuar drejtues, staf teknik dhe futbollistë të KF “Gjakova”

Me dhimbje dhe pikëllim të thellë e morëm lajmin për ndarjen nga jeta të më të dashurit tuaj, Denis Bakalli, andaj më lejoni që në emrin tim, KE të FFK-së, klubeve dhe gjithë komunitetit të futbollit në Kosovë të ju shpreh ngushëllimet më të sinqerta.

Lajmi për vdekjen tragjike të Denisit ka trishtuar e pikëlluar të gjithë komunitetin e futbollit në Kosovë. Ikja e tij e hershme nga kjo botë është dhimbje e madhe dhe humbje e pazëvendësueshme për familjen, por edhe për bashkëlojtarët e tij dhe futbollin kosovar në përgjithësi.

Denisi ishte djalë shembullor dhe me virtyte të larta. Ai vlerësohej talent i madh i futbollit në Gjakovë, por më shumë se të gjithë ne atë e deshi Perëndia dhe e mori afër vetes si një engjëll në parajsë.

Në këto momente të vështira për Ju, lus Zotin që të gjeni forcë për ta përballuar këtë dhimbje të madhe dhe Denisin ta kujtoni përherë me krenari.

Shpirti i tij i bardhë u prehtë në paqe!

Me respekt,
Agim Ademi, president i FFK-së