Presidentja e Republikës së Kosovës, Vjosa Osmani, ka pritur mysafirin e parë në Presidencë pas marrjes së detyrës si e para e shtetit.
Majlinda Kelmendi bashkë me ekipin e xhudistëve kampionë u pritën nga Osmani të martën në mëngjes në vazhdën e aktiviteteve për ta shënuar pranimin e detyrës së presidentes së Kosovës, shkruan Reporteri.net.
Osmani ka thënë se xhudistët e kanë lartësuar shtetin, edhe atëherë kur dështoi politike dhe diplomacia.
“Xhudistët tanë e kanë nderuar shtetin tonë e kanë lartësuar flamurin e Kosovës. Ka qenë rendësi për në që xhudistët që kanë qenë simbol për Kosovën, t’i pres në zyrën time që të bashkëbisedojmë për të ardhmen. Është e domosdoshme që shteti ynë të qëndrojë pranë tyre. T’i përkrah dhe ta shohim që flamuri ynë të valoj lart e më lart nëpërmjet fitoreve duke shpresuar që edhe tash e tutje do të na gëzoni pa masë”, tha Osmani.
Ndërkaq Kelmendi e uroi Osmanin për postin e ri dhe tha se është kënaqësi dhe privilegj të jetë mysafirja e saj e parë.
“Do të doja të uroja mbarësi në punë. Shpresoj se keni me qenë aty ku njerëzi kanë nevojë dhe kur kanë nevojë për ju. Shpresoj që keni me qenë bashkë me ne në Lojëra Olimpike, jemi pesë garues që e kemi normën.”, tha Kelmendi.Vjosa Osmani u zgjodh presidente e Republikës së Kosovës të dielën e 4 prillit, ku mori 71 vota nga deputetët.
