Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla, sot në mëngjes priti me ceremoni zyrtare në Aeroportin Ndërkombëtar “Adem Jashari”, homologun e saj Nikos Dendias, Ministër i Punëve të Jashtme të Greqisë.
“Vizita e sotme e Ministrit të Jashtëm grek është ngjarje e veçantë për Kosovën”, tha për medie ministrja Haradinaj-Stublla përpara zbritjes së homologut të saj në aeroport, duke shtuar se “Greqia si shtet anëtar i Bashkimit Evropian dhe shtet i rajonit tonë, ka vedosur një standard të lartë të konstruktivitetit politik – duke mirëmbajtur me Kosovën një dialog tejet praktik dhe duke përkrahur shtetin tonë në rrugën e integrimit Evropian”.
Kryediplomatja Haradinaj-Stublla i shprehu mirëseardhjen kryediplomatit Dendias, duke e falenderuar qyshnë fillim për vizitën e tij të sotme në Prishtinë, për qëndrimin konstruktiv të Greqisë, si dhe mbështetjen e saj dhënë Kosovës në proceset e integrimit.
“Sot pata kënaqësinë ta mirëpres Ministrin Dendias në Prishtinë, për të diskutuar më vonë gjithë gamën e bashkëpunimit tonë bilateral, dhe për të shkëmbyer idetë tona se si t’i thellojmë më tej marrëdhëniet në fushat e interesit të ndërsjellë”, tha shefja e diplomacisë kosovare.
“Me Greqinë na lidh edhe miqësia e përbashkët me SHBA-të, e cila është element i jashtëzakonshëm në ndërtimin dhe konsolidimin themeleve të forta të marrëdhënieve tona”, u shpreh Ministrja Haradinaj-Stublla, ndërkohë që takimin zyrtar me homologun grek do ta zhvillojë në orën 11:00, në Ministrinë e Punëve të Jashtme dhe të Diasporës.
